Fyrir nokkrum árum töluðum við helst um meltinguna þegar maginn var eitthvað að stríða okkur. Í dag horfum við á meltinguna í mun stærra samhengi. Vísindamenn hafa í auknum mæli beint sjónum að örverunum sem búa í meltingarveginum og tengslum þeirra við ýmsa þætti heilsunnar. Þarmaflóran er því orðin eitt mest spennandi rannsóknarsvið heilsuvísindanna.

Það sem við setjum á diskinn getur haft meiri áhrif á þarmaflóruna en margir gera sér grein fyrir. Fjölbreyttar trefjar úr grænmeti, ávöxtum, baunum, heilkorni, hnetum og fræjum næra meðal annars góðu bakteríurnar í þörmunum. Gerjuð matvæli hafa einnig fengið aukna athygli og eru í dag orðin áberandi hluti af umræðunni um heilbrigði þarmanna.

Samhliða þessu hefur áhugi á góðgerlum aukist mikið og margir þekkja nú vörur á borð við Bio-Kult, Probi og Progastro.

Það var einu sinni næstum stöðutákn að geta sagt: „Ég þarf bara fimm tíma svefn.“ Sú hugsun hefur heldur betur breyst. Í dag fylgist fólk með svefninum í snjallúrum sínum og hugtök eins og djúpsvefn og REM-svefn eru komin inn í daglegt mál. Enda er svefn langt frá því að vera bara hvíld, því á meðan við sofum fer fram mikilvæg endurheimt sem hefur áhrif á bæði líkama og huga.

Stundum eru einföldustu ráðin enn þau bestu; reglulegur svefntími, minna koffín síðdegis, minni skjátími fyrir svefn, dimmt og svalt svefnherbergi og ekki of þung máltíð rétt fyrir háttatíma.

Samhliða aukinni áherslu á betri svefnvenjur hefur áhugi aukist á innihaldsefnum á borð við magnesíum, melatónín, sítrónumelissu, L-theanine, kamillu og garðabrúðu. Úrvalið hefur líka þróast og í dag má finna allt frá jurtablöndum og melatóníni yfir í magnesíumkrem, sprey og baðflögur sem auðvelt er að gera að hluta af kvöldrútínunni.

Ef eitt steinefni hefur orðið að hálfgerðri samfélagsmiðlastjörnu síðustu ár er það magnesíum. Magnesíumduft, hylki, sprey, böð og krem - úrvalið virðist endalaust.

En á bak við trendið er raunverulegt og nauðsynlegt steinefni. Magnesíum stuðlar meðal annars að eðlilegri starfsemi taugakerfis og vöðva, eðlilegum orkuskiptum og að draga úr þreytu og lúa.

Neytendur eru líka orðnir meðvitaðri um að magnesíum er ekki bara magnesíum. Mismunandi form hafa fengið aukna athygli og í dag má meðal annars finna magnesíum malate, citrate, bisglycinate og taurate, auk útvortis vara eins og magnesíumspreya og krema.

Kannski ein skemmtilegasta breytingin í heilsuheiminum er hvernig við erum farin að tala um það að eldast. Áherslan er ekki lengur bara á að líta yngri út, heldur að halda heilsu, styrk og lífsgæðum eins lengi og mögulegt er.

Það snýst ekki bara um að bæta árum við lífið, heldur lífi við árin og til þess þarf alls ekki dýrar meðferðir eða flókna tækni. Styrktarþjálfun, dagleg hreyfing, nægilegt prótein, góður svefn, félagsleg tengsl og fjölbreytt mataræði eru allt þættir sem fá sífellt meiri athygli. Sérstök áhersla er einnig lögð á að viðhalda vöðvamassa og styrk eftir því sem árin líða.

Þessi þróun endurspeglast líka á bætiefnamarkaðnum þar sem áherslan hefur í auknum mæli færst frá skyndilausnum yfir í langtímaheilsu. D-vítamín er gott dæmi, sérstaklega hér á Íslandi, en einnig hefur áhugi aukist á próteini, kreatíni og omega-3 sem hluta af næringu og heilsu til lengri tíma.

Í dag beinist athyglin í auknum mæli að því hvernig samsetning máltíða og sveiflur í blóðsykri geta tengst orku, seddu og löngun í sætindi yfir daginn. Samhliða þessu eru fleiri farin að huga að því hvernig mataræði og daglegar venjur geta stuðlað að jafnari orku frá morgni til kvölds.

Nokkrar einfaldar venjur geta skipt máli:

·  Að hafa góðan próteingjafa í hverri máltíð

·  Að velja trefjaríka fæðu eins og grænmeti, heilkorn, baunir og fræ

·  Að hreyfa sig eftir máltíðir, jafnvel stuttur göngutúr getur skipt máli

·  Að borða reglulega yfir daginn

Áhugi á ákveðnum bætiefnum hefur einnig aukist samhliða þessari umræðu. Þar má meðal annars nefna króm, sem stuðlar að því að viðhalda eðlilegum blóðsykri. Eplaedik (Apple Cider Vinegar) hefur einnig notið mikilla vinsælda samhliða auknum áhuga á blóðsykri og næringu.

En eins og svo oft áður er grunnurinn mikilvægastur. Bætiefni koma ekki í stað fjölbreytts mataræðis, hreyfingar og góðra lífsvenja, en þau geta verið viðbót þar sem þau eiga við

Markmiðið er ekki fullkominn blóðsykur allan daginn, heldur máltíðir og venjur sem hjálpa okkur að halda orkunni jafnari og líða betur frá morgni til kvölds.

Þarfir okkar eru ólíkar og geta líka breyst eftir aldri, lífsstíl og árstíma. Fyrir suma gæti D-vítamín yfir veturinn verið ofarlega á listanum, aðrir vilja huga betur að meltingunni eða svefninum og sumir þurfa mögulega ekkert bætiefni, heldur meiri svefn, betra mataræði eða einfaldlega aðeins meira frí frá símanum.

Heilsuheimurinn mun alltaf finna næsta trend; nýtt innihaldsefni, nýja nálgun eða nýtt orð sem við lærum að bera fram. En grunnurinn breytist merkilega lítið - að borða fjölbreytt, hreyfa sig, sofa vel, viðhalda styrk og vöðvamassa, hlúa að meltingunni, fá dagsbirtu og ferskt loft og vera með fólki sem okkur líður vel með.

Bætiefni geta svo átt sinn stað þar sem þeirra er þörf, sem viðbót við góðan grunn, ekki staðgengill fyrir hann.

Kannski er besta heilsutrendið því einfaldlega að gera meira af því sem við vitum að gerir okkur gott.